दिल्ली के सिर पै बसै हरयाणा!

खुद्दारी हरयाणा स्टाईल ... By: जाट कवि -कर्नल  मेहर सिंह दहिया,  शौर्यचक्र 

दिल्ली के सिर पै बसै हरयाणा,
आप बोवै, आप खा, बेरा जी मनै ना दे दाणा|

जगह म्हारी घणी खास सै,

बड़यां की मेहनत और प्रयास सै| 

बैरी का आड़ै हुया नाश सै,

ना चाल्या इसतैं कोए धिंगताणा||

दिल्ली के सिर पै बसै हरयाणा|

महारी धरती का कोए तोल नहीं सै, 

दरया दिली का कोए मोल नहीं सै|

हिस्साब मैं कोए रोल नहीं सै,

जाण्या सदा ले कै लोटाना||

दिल्ली के सिर पै बसै हरयाणा|

मेहमान का मान बड़ा सै,

बण हनुमान यू सदा लड़ै सै|

गैर के रफड़े मैँ जरूर पड़ै सै,

मोल भले  कुछ  पड़ै चुकाना||

दिल्ली के सिर पै बसै हरयाणा|

तोल पिछाण कै यो हाथ मिलावै,

दुश्मन नै यू धूल चटावै| 

बोद्दे कै सदा साहरा लावै,

बोल इसके पै कति मत जाणा|| 

दिल्ली के सिर पै बसै हरयाणा|

के दिखै सै सादा भोला,

पहले टकरे मैं पादे रोला|

तर्क मैं इसनै हर कोए झिकोला,

आवै खूब बातां मैं बतलाना||

दिल्ली के सिर पै बसै हरयाणा|

बिना वजह मत इसनै छेड़िए,

करया हमला जाऊँ भेडीए|

छुडा पेंडा तुरत नमेड़िए,

वरना महंगा पड़ै इसतैं भिड़ जाणा||

दिल्ली के सिर पै बसै हरयाणा|

हर माणस मैं पावै कविताई,

शिक्षा बेशक यहाँ देर से आई|

अनपढ़ भी करै अगवाही,

देख पंचों का ज्ञान पुराणा||

दिल्ली के सिर पै बसै हरयाणा|

दिल्ली की हमनै मरोड़ काढ़ दी,

जी चाहा जब टाड्ड दी|

पकड़ नाड़ सही झाड़ दी,

नहीं होण दें मां माम निमाणा||

दिल्ली के सिर पै बसै हरयाणा|

कर्नल मेहर सिंह की बात सही सै,

समझनिया नै खूब लहि सै|

वफादार इस बरगा कोई नहीं सै,

पर मुंह इसको कति नहीं लाना||

दिल्ली के सिर पै बसै हरयाणा|