Thursday 6 October 2022

उज़मा बैठक "सांझी की सांझ अंतर्राष्ट्रीय मेळा अर मुक़ाबला 2022 - नतीजे अर न्याम!

थम सबनैं जय दादा नगर खेड़े/भैये/भूमिए की!


26 सितंबर तैं लाग 5 अक्टूबर ताहिं मुकाबले म्ह कुल-जमा 94 टीमा नैं हइस्सा लिया, जिनके कुल-जमा सदस्य बणे 687 ! 86 टीम क्वालीफाई करी, इणमें तैं 42 ईनामी कम्पटीशन लड़ी, जिनके नतीजे न्यू रहे:
रपिये 5100 का पहला न्याम जीत्या: बुनियाद शिक्षा निकेतन रोहतग ने
रपिये 3100 का दूजा न्याम दोयां का टाई रह्या: सुदेश नैन टीम, गुहाणा, सुनपत अर सन्नी बेलरखां टीम, जिंद
रपिये 2100 का तीज्जा न्याम दोयां का टाई रह्या: पूनम गिल नेहरा, टोरंटो कनाडा अर सुषमा बेलरखां टीम, जिंद
रपिये 1100 के 3 तैं ले 10 लंबर लग 8 न्याम जीते:
लंबर 4: कमलेश सिवाच, स्याम्मण रोहतग
लंबर 5: सुखविंद्र कौर, रोहतग शहर
लंबर 6: सरोज भाल्ली, रोहतग
लंबर 7: पिंकी समचाणा, रोहतग
लंबर 8: निम्मी ढिल्लों, लंदन इंग्लैंड
लंबर 9: अनीता चौधरी, मेरठ
लंबर 10 पै दोयां का टाई रह्या: टाइम्स इंटरनेशनल स्कूल रोहतग अर HPS स्कूल पोंकरी खेड़ी, जिंद

बाकी जो बचगी 86 क्वालिफाइड टीमा म्ह उन हरेक नैं रपिये 500 सादर दिए जांगे!
इस की गेल सारी टीमा के प्रिंटेड सर्टिफिकेट दिए जांगे, कुल 687 हइस्सा लेणीयां म्ह 452 (ऊपर-नीचे हो सकै सै) 25 साल तैं कम उम्र के सारे बाळक-टाबरां नैं खस्माने सर्टिफिकेट दिए जांगे!
टीमां के अलावा डेली की एंकर्स म्ह पहली बै एंकरिंग ताहिं उज़मा ट्रॉफी अर एंकरिंग का सर्टिफिकेट दिया जागा, जिन्नें पहल्यां ट्रॉफी मिल ली उन ताहिं सर्टिफिकेट दिए जांगे!
मेन-डे पै जिन मानजोग एंकर अर जूरी नैं प्रोग्राम चलाया उन सबमें पहली बर आयां नैं उज़मा की बड्डी ट्रॉफी अर सर्टिफिकेट; जिन्नें ट्रॉफी पहल्यां मिल ली उन्नें श्याल कै लोई अर सर्टिफिकेट!

अर और एक सबतैं ख़ास न्यामी घोषणा: इस साल के उज़मा बैठक विशिष्ट सम्मानां बारै:
1 - इस बर का "चौधरी कबूल सिंह बाल्याण हरयाणवी इतिहास, साहित्य एवं शोध सम्मान" गया सै डॉ. रामफळ चहल जी ताहीं
2 - इस बर का "दादा मेहर सिंह फौजी हरयाणवी थिएटर एवं फिल्म सम्मान" गया सै डॉ. अनूप लाठर जी ताहीं
3 - इस बर का "महाराजा हर्षवर्धन बैंस सर्वखाप सम्मान" गया सै म्हारे तीन खाप-चौधरियां ताहीं:
अ - दादा चौ. सूरजमल सिंह पंवार जी, प्रधान बत्तीसा खाप, शामली - उत्तर प्रदेश
ब - दादा चौ. सुरेंद्र सिंह तोमर जी, प्रधान देश खाप, बाग़पत - उत्तर प्रदेश
स - दादा चौ. ओमप्रकाश धनखड़ जी, प्रधान धनखड़ खाप, झज्जर - हरयाणा
4 - इस बर का " महाराणी किशोरी किनशिप सम्मान" गया सै दादीराणी कुलवंती राठी जी ताहीं
इन सब सम्मानजोग दादी-दादियां-हस्तियां ताहीं दी जागी इनके सम्मान लयखी बड्डी ट्रॉफी अर सर्टिफिकेट!

नोट करियो: सबके मान सम्मान कै तो रोहतग बला कैं दिए जांगे कै कूरियर तैं खंदाये जांगे! जो म्हारे खाप चौधरी अर विशिष्ट सम्मान सैं यें कै तो उनके घरां जा कैं दिए जांगे कै उन्नें ख़ास आमंत्रण व् सत्कार करकें दिए जांगे!

जय प्रकृति, परमात्मा अर पुरख यौधेय!

इस नोट के जारीकर्ता: इस सांझी कम्पटीशन की इवेंट लीडर्स अर एडमिन टीम!

No comments: